惡女的志向

兩公婆要傾密計愈來愈難，因為惡女總是要加把咀，她每次都要打爛沙盆：「你地講緊乜呀？我又想傾呀，一齊傾丫，點樣傾呀？」

要說句「大人的事細路咪理」好容易，但試想想，數十年後，到你想跟她談天說地時，而她同樣跟你說：「後生的事，你啲老野咪理！」係幾咁hurt。

所以，我們會盡量讓她加入，要知道我本人思潮澎湃，要停下來把每句說話都翻譯成「兒童版」，實在非常吃力，不過，也有很搞笑的時候。

昨晚，我們閒聊時談到我某朋友，她藝術天份挺高，卻花了好些金錢、時間來辛苦攻讀自己完全不ok的Finance，只為有個學位，讀了的東西其後完全冇用，到現在終於正正經經走去讀fine art。男婉聽了不無唏噓，而我則正氣凜然地說：「所以我都不明白怎麼有些父母，明知仔女喜歡的是另一些東西，卻指定他們去讀大路的商科之類。」

「你地講咩呀」惡女又冒了出來。

「呢......我地話，有些爸爸媽媽迫仔女讀他們不喜歡的科目......（突然有感而發）惡女，將來你想讀甚麼，只要諗得清清楚楚，爸爸媽媽都不會阻止你！」

「即係點呀？」

「即係呢，如果你喜歡做醫生，可以去讀醫科；喜歡畫畫，可以去讀藝術......」哈哈，結果我舉的例子都好典型，我都覺得自己有點自相矛盾，和之前的有型不符。

「呀，我知啦！我第時要讀...高班E！」

忍不住爆笑，但必須立即轉回認真mode，「哦......咁樣，點解會有呢個志向呢？」

「因為高班E班主任係劉老師！」

原來劉老師曾經在惡女拍學生照時，為她整理頭髮，想不到她對此老師就這樣一見鍾情。

不知惡女的志向能否成真呢？不用等十數年，下個月就知。