昨天無啦啦做佐一天中環人,其實都唔係無啦啦,為了這天其實都計劃了一至兩個星期,上網搵資料、查看地圖、預約,以致昨天一切都run得幾順暢。
跟上班一樣時間起床了,到公司附近的咖啡室吃了個muffin, 便上船去了。在船上和同行友人談天說地,轉眼間便上岸了。(回程時的航程卻是另一番差天共地的經歷,待會再說)
來回程都是使用自助過關,感覺自在,好像沒有過關一樣,太棒了! 繼而前住今天的目的地--中環。
一早已預備好知道要走B出口, 打算一出到地面便問路人和警察叔叔大新銀行在哪。我們在路上頭咢咢之際,發現原來大新銀行的招牌己在頭頂上!
放低一大張金牛、一條紅衫魚及一隻青蟹之簽証費後(超貴), 正式開展中環之旅。從銀行望過對街, 一間間名店就在眼前, 假如我們都是闊太的話,中環應該可愛得很。
不打緊,睇下都好。美輪美奐的商品盡在眼前,真係睇下都開心。 看見一些不用上班的人在商場中的半露天茶座吃早點,多寫意啊!
欣賞環境之際,我們都看看路上的人的神態、衣著,我們都不約而同地認為走在中環的港男都有著一份自信,比起眼神游離、漫不經心的澳男醒目好看。
走走看看拍拍照,又到今天的重點,試食中環MO裡面的米芝蓮二星法國餐Amber。
可能由於還未到lunch時間, 初時還以為要包場。隨著客人紛紛入座, 到1點lunch time 直頭full house, 連vip 房都座滿了! 果然是名不虛傳的米芝蓮二星。
無容置疑,服務是很周到的,但當服務員介紹菜單時真係令我們都忍俊不禁。
例如: 前菜 FINE DE CLAIRE OYSTER
服務員說: 呢個STARTER就係有POTATO VICHYSSOISE WITH呢個既 CAVIER GO ALONG WITH 呢個既OYSTER同埋有 SEAWEED BUTTERED TOAST AT THE SIDE既
她就如是者一口氣如機關槍咁將個菜單由前菜開始“介紹”到甜品,In fact個MENU上已經有呢D DISHES 既DESCRIPTIONS (學她夾雜勁多英文TERMS口吻),佢又係咁讀返出黎,中間加返D “呢個既”“同埋” “就係有”或者 “ON TOP有” “GO ALONG WITH” 又或者 “ AT THE SIDE” ,咁即係想點呢?ANYWAY,這只是一個好笑位,無傷大雅。
高潮位當然是我們交換生日禮物及互相預祝生日快樂,更值得慶祝的是我們之間的這份友誼,我們還在想當我們六十歲時繼續一同慶祝生日的情景,雖然這是四十年後的事。
飯後到領事館及做FACIAL,途徑已圍滿鐵馬和警察的立法會以及周街掛滿 “起錨”及 “超錯”的大字報,不過對於我們是好事,因為我們每行一小段路就有一位警察讓我們問路,這樣我們便很順利地從MO步行到領事館及隨後的德己立街水療坊。
領事館的所見所聞不在此詳談了,因為大多數領事館都總是會擺出一副高高在上的樣子,驚死你入去打劫咁款,亦無須大驚小怪。不過一向自稱很重視人權的美國,其領事館內旅客和領事代表的面談內容是完全公開的,這是由於旅客和領事代表之間隔著防彈玻璃,要用擴音器才聽到雙方的對話,那人們的私隱權又去了那兒呢?就好似去中藥房睇中醫咁,隔離排隊果幾位亞姨和來買清補涼的亞嬋知道你原來有痔瘡!
雖然被領事館門口果位實蕉無理刁難,但都無損是次中環之旅的興致,之後再到水療坊一邊做FACIAL一邊小睡一會,然後再到翠華茶餐廳吃個TEA, 走走擦鞋街和時裝店,這樣又到了下班時候了。
假如你有花不完的錢的話,中環的確是個好地方,豐儉由人,應有盡有。世上有些地方即使有錢也未必有這樣多樣化的選擇。
回程嘛,竟然暈船!勁想吐!那一小時好像過了一天!