我地就係奧運！

近日奧運氣氛席捲全城，周日賦閒在家固然睇足全日，奧運節目精采，原來三色台的主持陣容更精采，包括有識少少扮代表的「阿LACK」、精神委靡但在保持髮型及谷胸方面不遺餘力的「你黑人」、將「易建聯」讀成「異見樂」的「羊丸兒」......不過當中最引人注目的，莫過於剛卸任港姐「窗框兒」。

其實早該留意到她的「正」，今年港姐競選中「窗框兒」在發表卸任宣言時已經嶄露頭角，在supposed好優雅的繞場環節，突然眼神空洞極騎呢式地揮手，唔講以為盧海鵬搞緊笑，想不到由她去主持奧運，效果更是另類。

首先，長期keep住90年代少女照沙龍的含情脈脈look，已經難度極高；機械式每隔數秒望一眼partner作為「交流」甚富韻律；輪到其說話時，像忽然上身一樣喪興奮，然後又立即回復木面，具戲劇性......但說到底，她長期魂魄唔齊、九唔搭八的狀態，才是重點，好日唔出聲，一出聲誓必有驚喜！（仲見過佢節目開始時仍時在撥弄秀髮）

精采對話大約如下(exact wordings就緊係唔記得啦)：

1) 窗：「拿，我地見到蘇聯隊已經上左頒獎台......」
蘇聯！嘩，蘇聯喎！！解體十幾年咯喎，仲有奧運代表你都咪話唔驚......

2) 窗：「（突然造出興奮表情）頭先睇跳水真係好緊張，D火花好少......」
其實佢想講「水花」

3) 「其實做運動員都好大壓力......」
窗：「係呀，佢地會整損D手呀、頭呀......」

4) 「你點睇呢兩隊呢？」
窗：（突然由硬化沙龍少女樣變成好high）：「奧運真係好緊張呀，（緊握拳頭）無論點我地會支持北京奧運嫁！」

好明顯佢真係唔知自己做緊乜。

睇奧運，果然要睇三色台，因為佢地就係奧運！（一直唔明呢句）

好可惜，今日要上班，不能再直擊「窗框兒」的精采表現......懇望三色台千萬不要換走「窗框兒」！

後記：今日睇網上新聞，竟見此標題「田亮以觀眾身份看奧運 窗框兒被贊淡定大方」好驚呀！！！
係「入定」唔係「淡定」下嘛，而「大方」，會否是指其面部輪廓？