其實我很介意

中午時份。

電話响起,來電為 00的海外電話。

趕緊接電,因沒有電話號碼可回覆的。

電話裡頭一把女聲以快人十倍的速度說, “請問你是否66xxxxxx的機主?”

我還未趕得及回答, 她已好像一把機關槍的連續說了幾百個字, “我是xx雜誌的代表, 你的電話號碼被隨機抽樣形式抽出,成為澳門區的文化推廣對象,我地今次的文化活動, 主要是……………. (下刪三百字) …….小姐,  我姓陳, 叫kary, 請問你貴姓?”

我還未趕得及回答, 她便搶閘說, “希望你唔好介意呀,我都係唔想喂小姐喂喂聲咁稱呼你….”

當時我還有點無聊, 即管聽聽你的有何偉論, “我姓x”。很少聽到此類電話, 又好奇想聽下你係咩東東。

她續說, “x小姐, 希望你唔好介意呀,你平時睇咩書多架?如果我們為你郵寄一些文化刊物, 你會選擇中文定英文?” 語氣像免費寄比你睇咁。

我望著書桌上的英文書,那一刻也想找本中文書來調劑一下。

我說, “中文。”

她突然提高語氣, “希望你唔好介意呀,有d讀者有中三程度我都會建議佢地讀下英文,你知啦, e家澳門發展得咁勁,咁多外資湧入………………..(下刪三百字,大意是 “提點”我要多閱讀英文書籍)…….

我沒好氣地說, “咁你意思即是要我揀英文啦, 咁英文咯。” 心想, 咁你就一早唔洗問我啦。

“希望你唔好介意啦, x小姐,” 因為我服從了英文, 她以 “贏了”我語氣續說, “拿,你都知啦,我地e家搞緊書展,你地又黎唔到

(?!?),

咁我地e家以優惠價$........ (下刪三百字, 開始推銷其文化雜誌)

我見勢色不對,開始覺得她在浪費我的電話通話時間, 便直接潑她一盤冷水說, “咁你即是推銷啦, 要比錢的我唔要, 唔好意思, 我有野做緊…..”

“希望你唔好介意啦, x小姐”, 她突然搖身一變成了老師, 開始講道理 “ 你睇下呢d書開拓下眼界呀, 你唔好睇咁多果d咁八卦週刊嘞

(?!?),

我希望你花d時間留意下經濟時事咯…………”

突然間覺得, 越來越多呢d騎呢野流入澳門了, 這是否城市發展的必經階段? 我不想要輕軌鐵路、大型旗艦項目、騎呢推銷電話, 我只想時光可以倒流,回復以住的恬適。