去年由於懷有惡女，不得不停止了我鍾情的美容按摩活動，產後又分身乏術，也擠不出時間。如今惡女已屆七個月大，而我的一張臉已經污穢如泥，所以決定重戰江湖。
誰知，電話打不通，網頁失靈......心裡有種不祥預感，同男婉講：我懷疑「海殺會」執笠。話口未完，就收到一個奇怪的SMS，說「海殺會執笠，現袋美容大慈大悲幫苦主完成套票。」晚間新聞也將事情和盤托出。
其實已經年多沒有光顧，一直都不敢存有太大寄望服務能如往昔一樣，想不到，連笠都執埋。我因此損失了約二千元，慘慘慘。
不過其實我更愁的，是以後不知到哪做美容了。一向都對美容院有很大戒心，覺得十居其九都係呃呃乙水乙水，除非大灑金錢到高級的，否則都係俾人當水魚。海殺會是例外的，同規模的美容院它算是老實，有次帶善姨去光顧，她們竟然忘記收取其面膜費，任由她大搖大擺地回到美利堅。而我本人，最驚俾人困獸鬥，又或者在你成面野時，話你樣衰都差點沒得救，好彩佢地有種新科技云云。
在海殺會，我幾乎沒有遇上這種不快，雖然也有人進來問我加唔加點甚麼，但只是我說不加，她就識趣走了，而且態度仍然很好。獨立房間，不限時間任你睡，睡完又可焗桑拿......回想起來，也真很懷念那時的周六早上，整個人好彩煥然一新地走出來，男婉這時剛好下班，便和他一起去找吃的，要是他遲下班，我就獨個兒去逛街、逛書店......此情不再，此情不再矣。
海殺會的結業，真令人無限感慨，也正式為我當時那種悠閒的生活劃上句號。
海殺會稱，他們的結業也是無奈的，因為金融海嘯的關係，「公司曾多次向銀行申請中小企貸款，但遭拒絕，加上銀行信用卡肆無忌憚強行扣押血汗錢，令美容中心在無辦法下選擇結束。海殺會又批評政府並無正視中小型美容院的生存問題，沒有加以支援。」
講到我都怪佢唔落。（不過如果買左30萬套票果個係我...我諗我冇咁感性。）
BTW，我這污穢的臉，點算？
咁你唔去現袋美容做埋果2千幾蚊?
回覆刪除查實我以前都試過同樣經歷呀,諗諗下我都幾耐無上美容院,都佢還經常send d推廣短訊黎,應該未執掛....
扁姐
現袋美容，我覺得好恐怖的，好似好奸咁......我要睇下人地feedback先決定，但長遠我會搵過另一間。
回覆刪除你都試過買左套票間野執笠？
扁妹
我都有睇到有關海殺會的報導啊,真可惜~~
回覆刪除我以前果間(是那些個人小店,不是大型連鎖店來的)咪又係結業比第二間完成埋佢,但係第二間又貴又唔得,結果做佐兩次咪係咁咦攞返d護膚品囉
你果二千蚊無理由眼白白睇住佢無佐架嘛,攞返d護膚品得唔得呢?
扁姐
我要佢D護膚品把屁咩，我自己都懶得查，我鍾意有人幫我捽面丫嘛。
回覆刪除不過我到而家都唔明點解第二間店又會肯「幫」執笠店完成療程既？
扁妹
facial你又唔做,護膚品你又話唔要,你唔係好似你亞媽咁嫌錢腥呀嘛?
回覆刪除錢又比佐咯,比我就會去現袋試一次先,啱未做埋佢,唔合心水就同佢講數,睇下攞得返d咩,唔比就去消委會!
雙方梗係有開個價買d客源返黎,始終會有d人會轉去現袋繼續做的。
扁姐
現袋出名古惑，真係唔信佢咁好人「義助」苦主囉，我上網睇有D人問過，原來係要俾番同樣的錢去買佢地的套票，佢地先會「義助」你之前損失那些......我仲上去，咪送羊入虎口，咪搞。
回覆刪除其實我都預左由得佢，因為都明知係追唔到的，而且我過去年幾都冇做FACIAL，咪當抵銷左呢筆錢囉......反而係好愁以為去邊度做FACIAL。
扁妹
又會咁岩你想去時就執,真係唔好彩~
回覆刪除我去個間就唔係大間既,不過係hair culture集團...我又係唔鐘意d hard sell既,所以現代美容唔好預我~
[版主回覆07/15/2009 15:51:00]現代真係俾都唔去，而且佢地已經現晒狐狸尾巴，上網睇苦主的討論區，佢地話現代竟然話自己的facial價值萬幾蚊一次，所以你有萬幾蚊套票佢都係「義助」你一次（咁我得二千蚊，可能只係修一條眉的費用）......真係唔知多唔多謝佢。
所以我寧願當發左場夢，都唔會向現代「求助」囉。
你果間好唔好？有冇桑拿焗？