屋漏偏逢連夜雨

早前已曾列舉這陣子在追討的各種事項，如今已經追得七七八八，還以為能稍為歇息一下，誰知，新的case又接蹱而來......

昨晚累極了回家，赫見門口有黃紙一張，難不成有人願以天價徵求我倆的房子，一看－－「追債信」？？？？？

天呀，我係窮，但係每期卡數我都還清，有早冇遲喎，難不成是男婉？幸好，細看之下發現那人名根本不是我們，是一個不知名者。

唉，又要打電話，又要搞一輪，今次不是「追討」，卻是「反追討」，更棘手吧。

先打去那財務公司，斬釘截鐵要他們除去我們的地址，並稱再受滋擾立即報警云云，可那女人連巡例的「唔好意思」都無，唯唯諾諾說好，直覺告訴我，她當我唱歌。掛線後心想不妙，大概所有欠債的人都會打電話去說並無此人，我如何證明自己不是該人呢？

喂，咪住，做乜係要我去證明一件唔關我事既事真係唔關我事？

頭都大埋，唔理三七廿一打去恒生追數部，再嘈一次，嘩，那接電話的女人大概是江湖人物，硬要我給戶口號碼，否則「查唔到」，阿姐，我連爭債人係乜誰都唔知，何來她/他的戶口號碼呀？死纏，她著我把信fax給她，我不願留電話（嘩，我唔想接收數電話喎！），她語氣極差地說：「小姐，你唔留電話，我地點覆你呀！一係你落分行啦。」

這江湖女人似乎並不會為我解決問題，我一會兒還是到分行好了......可是，分行的人又會因為我一個不知名的人的申冤，而就此相信自己追錯債仔嗎？？剛才的經驗告訴我，無論如何，人家都首先會當你是「扮晒野」的債仔，而不是無辜的受害者。

遇上這樣的事，只有嘆句：「好黑仔！」

被拖數、鑑生被追債、該跟進的無人跟進......究竟這一切本不該在文明、合理社會發生的事情，何時才有完結的一天？